• دكتور خلوق جدا يهتم لمصلحة الطالب وفهمه أكثر من الطالب نفسه، اختباراته فيها صعوبة ويبيلها فهم وتركيز لكن الدكتور متساهل فالدرجات، أشوفه خيار ممتاز.
• ترم كامل عن بعد، الدكتور من ناحية الشرح لاتدور غيره خصوصا مادة مثل ١٠١ حقق انت بتدور واحد يشرح ويأسسك زين مهب واحد يدف وبس، من ناحية الدرجات الدكتور يدف دف مب طبيعي لكن اختباراته مهب سهلة يعني خنقول متوسطة التحضير ما ادري بصراحة هو يحضر ولا مهب يحضر
• الدكتور ممتاز من ناحية الشرح بتطلع فاهم المقرر كويس لكن اختباره فيه صعوبه شوي عموماً الدكتور يدف ذاكر معه واجتهد وبتطلع بقريد عالي
• دكتور عسسسل ويساعدك بكل اللي يقدر عليه ، ورغم ان المقرر دسم شوي بس الدكتور يفهمك ويبسط لك الامور ومن ناحية الدرجات مارح يقصر دفنا بقريد كامل غير الكم درجة اللي قبلها
• درست عنده بترم الاول كورنا باختصار اكلنا مقلب فيه. شرحة يسولف يعني يقرا العنوان ويبحر فيه لازم تركو معه عشان تفهم التحضير ما يحرص عليه ابدا.. الاختبار ميد واحد من 30 ودبل درجة الميد. كان الميد صعب لكن يده خفيفة بالتصحيحة دفنا قريد باخر شيء معي 3 اعرفهم كلنا طعلنا ب d.
• اذا تبي تأسيس صح رح عنده بدووون ما تتردد دكتور أخلاقه عالية واسطوري بالشرح .. درست عنده بترم الدراسة عن بعد والاختبارات حضوري يعيبه شيء بسيييط أنه دبل درجات الميد وأضر ناس لكن بالفاينل دف كثيييير اعرفهم ... الخلاصة بتشد حيلك معه بتمشي وبتراجع معه بتفهم أما ما راح تركز معه وتبي درجات اقولك من الحين لاتنزل عنده ... دكتور اسطورررري
• افضل دكتور شرح بتفهم معه بشكلللل + اختباراته واضحه بس ذاكر وافهم وبتحل صدقني وبيدفك قريد تقريبا تعامله ممتاز جدا
• شرحه حلو واختباره مب سهل صراحةً بس مقدور عليه ، بس ترى مافي امل يغيب من الاخير + ترم كورونا ظالم الدكتور ولا احسه افضل من كذا بكثير
• الله يوفقه ويجزاه خير الدكتور عنده ذمه وضمير ويشرح زين مره مره ومتواضع جدا وتراه بروفيسور اختباراته متوسطه لكنه يدف بالنهاية دفعتي دفنا بالميد والفاينل
• تتعب وانت تمدح فيه للامانه انا طالب محاسبة وتساهلت بالمادة توقعتها حفظ وتقدر تدرسها لحالك لكن المادة تعتمد على الفاهم بشكل كبير ،الدكتور تقسيمه للدرجات 30 30 واختباراته متوسطه فيها حقها للامانه لازم تذاكر كويس وتفهم والتحضير مايحضر وتعامله راقي ومن ناحية الدرجات ماقصر للامانه شادتني فوق القريدين الله يجزاه خير ..اذا ماحصلت هواري بالعربي ترا العجرود خيار جيد
• متواضع إلى أبعد الحدود علمًا انه بروفيسور وأخلاق وشرح وتعامل اذا تبغا تأسس نفسك في المادة نزل عنده وبالنسبة للدرجات زاد كل طالب حدود ٧ درجات
• دكتور لو اكتب فيه من اليوم الين بكرا ما اوفيه حقه لا من اخلاق ولا من تعامل ولا درجات ولا من تحضير دكتور ماشاءالله خلوق بكل ماتحمل الكلمة من معنى درست عنده مبادي قانون افضل دكتور يدرس هالمادة اذا تبي تاسس نزل عنده وانت مغمض الله يرزقه ويوفقة البروفيسور جمال العجرود
• اجمد دكتور بالجامعة تستفيد منه بس في طلاب يبونه يحل لهم الاختبارات ويعطيهم درجات كامله وهم ما يستحقون انا درست عنده وذاكرت وجبت درجه ممتازه الدكتور جااااااامد
• تعامل كويس شرح كويس ، الدرجات فضيحة في توزيعها ، هالترم استثنائي بدل ماتتيسر الامور صعبها علينا ودبل درجات الميد وبالنهاية اكلناها... الاختبار يشكك بنفسك واسئلة مب واضحة للاسف وتخليك تشك بنفسك ، ماقول الا حسبي الله ونعم الوكيل
• درست معاه قانون ١٠١ الدكتور في التعامل و التحضير ١٠ ما عليها كلام. الشرح حلو بس المادة شوي غثيثة. اما الدرجات انا درست معاه في الترم الي كله عن بعد كان عنده مد واحد بس من ٣٠ المد كان وسط يميل الى الصعوبة(سؤال واحد علل صعب مره)بعدين لانه الكلية تسمح بختبار واحد دبل الدرجة فصار من ٦٠ بس عطانا ٥ درجات بعد الدبل و يده خفيفة في التصحيح المقالي. في النهائي موحد بس دف يمكن قريد او قريد و نص. بشكل عام الدكتور كويس بس مو قد الكلام الي سمعت عنه خيار جيد
• الدكتور ما يحضر وهذي ميزة صعب تلقاها، والشرح ممتتااااازززز، والتعامل جدا جميل مع الطلاب وما عنده مشكله يوقف الشرح عشان يجاوب على سؤال طالب، لكن الميد كان فيه صعوبه والفاينل كان ججددااا صصععبب، هو الأفضل بهذي المادة
• الدكتور هذا تعامله كويس اسلوبه ممتاز ولكن من ناحية الدرجات والله ما تساهل معنا ابدا مع انه ترم استثنائي المفروض يتساهل شوي، دبل درجة الميد اللي كان ميد واحد بس وطلبناه نعطيه تكاليف او بحوث اهم شي لا يدبل ورفض ثم جانا الاختبار الموحد اللي ما تدري هم يختبرون ناس بالمستوى الثاني والثالث ولا يحسبون انهم يختبرون محامين دولين .
• الدكتور مهب على قد التقييمات ابداً وبصراحة نكبنا في الميد لأنه دبل الدرجة حقت الميد وما اختبرنا إلا ميد واحد بسبب ان الكلية منعت يحطون اختبار حضوري ثاني وهو ماعنده تكاليف ولا شيء عن بعد ...
• ما ادري اذا الترم هذا يعتبر اسثنائي والشدة ضعف من الكلية او لا لكن الدكتور من ناحية التعامل ممتاز والتحضير كذلك اما بالنسبة للشرح اشوفه عادي جداً، الطامه في الدرجات طبعاً في هذا المقرر يحط لك اسئلة ما تقدر تعرف الجواب صح او لا يعني كل دكتور والي يشوفه ممكنه غيره يحط صح وهو غلط والعكس، بأختصار (يصحح على مزاجه) وبالنسبة للبحث الترم هذا كانت الشعبة كثيره للأسف ف حط مل خمسه في بحث واحد وبالنسبة لي كانت نقطة سلبيه لأني كنت مجتهد في البخث وغير مرخي ف الدرجة كانت مو كويسه
• أنصح فيه لأنه أفضل واحد بهذي المادة مافيه أحسن منه المنهج بيخلصه أول ست اسابيع كذا بعدين يختبركم ميد من ٣٠، الاختبار اسئلته عملية، ليست مقالية ولا فيها حفظ(يعني مافيه سؤال عرف او عدد)، والبحث من ٣٠، الفاينل كان سهل وجاب سؤال جديد عن الميد الي هو يعطيك التعريف وانت تكتب المصطلح، والدكتور محترم جدا و متمكن جدا من المادة و تعامله رائع مع الطالب.
• الدكتور حبيب ولا يدقق بالحضور بس لازم تشد حيلك معه وبتطلع بقريد حلو